Сүт-Хѳл кожууннуң тѳвү - Суг-Аксында Александр Санданович Ондар аттыг тѳп культура бажыңынга Тываның чогаалчылар Эвилелиниң кежигүнү Раиса Чүлдүмовна Ховалыгның "Черим , чуртум - чоргааралым" деп номунуң таныштырылгазы ноябрь 11-де, бѳгүн болуп эрткен. Байырлалга Тываның чогаалчылар Эвилелинден Александр Ондар, Тимур Кадын-Нава, Тыванын улустун чогаалчызы Черлиг-оол Куулар, Тываның культуразының алдарлыг ажылдакчызы Доржу Монгуш, Чѳѳн-Хемчиктиң "Бора-Булак сырыны"чечен чогаал каттыжыышкынындан Чечена Монгуш, Нина Монгуш, "Чаа орук" солуннуң кол редактору Вячеслав Монгуш, Суг-Аксы ортумак школазының үстүкү классчылары болгаш культура ажылдакчылары, тѳпчүткен Черлиг-оол Чашкынмааевич Куулар аттыг библиотека системазының, кѳдээ библиотекаларның эргелекчилери киришкеннер.
Ном таныштырган автор, эмчи мергежилдиг Раиса Ховалыгның чогаадыкчы ажылдарын баштай Артык Хѳм-Оттуковна Ховалыгның тургусканы "Эне сѳзү" солунга, Тываның херээжен чогаалчылар Ассоциациязының даргазы Артык Ховалыгның редакторлааш чырыкче үндүрүп турганы "Кадын" сеткуүлден, "Улуг-Хем" чечен чогаал альманагының үндүрүлгелеринден номчуп танышканымны сакты-дыр мен.
Раиса Чүлдүмовнаның "Баштайгы сѳң" деп ному 2004 чылда чырыкче бодараан, ооң соонда "Амыдыралдың ѳңнери" деп ному үнген.
2015 чылда "Тываполиграф" бүдүрүлгезинге, ийе, Тываның күрүне типографиязынга "Ынакшылды камнаан болза" деп номун парлаан. Сүт-Хѳл кожууннуң чагырга даргазы Арбак Ооржак, библиотека системазының директору Оюмаа Ѳлзей-оол, 86 харлыг хоочун Норбу Чаш-оолович Ховалыг, ѳѳредилге килдизиниң эргелекчизи эш-ѳѳрү суй-белектерни сунуп, байырны чедиргеннер. Автор бодунуң номнарын сѳс алганнарга, ѳѳрүп четтиргениниң илередиин кылгаш, белек кылдыр сунуп турду. "Бора-Булак сырыны" чечен чогаал каттыжыышкынының идекпейлиг кежигүнү Чечена Монгуш Раиса Чүлдүмовнага чырыкче үндүрген ийи номун белекке сунгаш, чылыг чымчак сѳстерни каттыжыышкынның, Чѳѳн-Хемчикчилерниң, Чадаана хоорайның чурттакчыларының мурнундан илереткен. Бо солун хемчегге кады киржип чораан башкы, "Чадаананын чадаганы" каттыжыышкынның идекпейлиг киржикчилериниң бирээзи, чурукчу Сергей Маадыр-ооловичиниң ѳѳнүң ишти Нина Дугаржаповна-биле чечекти, суй-белекти тывыстывыс. Шүлүкчү, эмчи угбай чоокта ээлчеглиг чаа ному чырыкче үнүп, типографиядан Тываның чогаалчылар Эвилелинге эккээри билек баштайгы ийи номну даргавыс Сайлыкмаа Салчаковнага болгаш меңээ сунганы - ном, парлалга шугумунда ажылдап чоруур бистерге ѳѳрүнчүг белек болганын бо чүүлдүң түңнелинде онзалап демдеглээйн.
"Черим , чуртум - чоргааралым" деп номунуң таныштырылгазы
11 Ноя.
